2744 2938 2623 9000 ecjobs@nextdigital.com.hk 香港新界將軍澳工業村駿盈街8號

今期熱話

公司轉型發展塑膠產品 靠洗樓拉大客

Sales工作甚艱難,尤其是要1個人擔起整個公司的業務,現擔任其力行營業經理的Ken(賴永祥),在公司營業部任職超過15年,入行時正值公司轉型發展塑膠產品訂製服務,作為開荒牛的他,每天拿着樣辦洗樓找客,憑着貼心及個人化的服務,成功吸引到酒店、食肆、洗衣公司及主題公園等過百間公司與他們合作,把品牌帶進不同的行業。

今年40歲的Ken是其力行的營業經理,作為銷售人員,除了口才好外,他表示對產品的製作工藝也要有所認識,「我哋主要係為客戶度身製作塑膠產品,例如板車、垃圾桶、食物盤、水馬等。我哋用緊滾塑技術,對比坊間多數採用嘅注塑技術,模具成本平約7、8成,令我哋做到較易令人接受嘅價錢,亦做到小批量嘅訂製服務,客人平均會訂100至200件,有啲10件以內都有;現每件產品售價由3百多元至8千多元。客人都會問我哋產品嘅特色,解答到佢哋嘅疑問,對傾成單生意會有幫助。」

其力行是一間塑膠產品訂製的公司,在內地設廠,每年約有2千萬營業額,與過百公司合作,當中包括美心、嘉頓、迪士尼、海洋公園、雅潔洗衣等,而香港的銷售業務主要是由Ken一人包辦,「日常工作係見客及搵新客戶,然後上去了解客人有乜嘢要求,我再同設計團隊溝通,得出設計圖後,我負責埋解釋畀個客聽,扮演橋樑嘅工作。」

95年中五畢業後,Ken加入一間建築公司任職工程助理,2年後更升為管工。「97年金融風暴後,市道開始變差,建築公司不斷裁員,99年就裁到我,我之後轉去其力行做送貨司機,當時公司主要售賣拖架配件。」

sales有分紅

01年,其力行嘗試轉型發展塑膠產品,Ken便藉此機會由司機轉職為營業員,「公司有用滾塑機造貨車擋泥板,去到01年,老闆改為主力發展塑膠業務,佢想搵人做sales。我喺做司機送貨時,已經鍾意同啲客傾偈,覺得周圍走嘅工啱我,加上sales有分紅,有機會賺多啲人工,就決定試吓轉做sales。」

Ken表示做開荒牛是較辛苦,但也容易得到機會,「坊間嘅食品工場多數用鐵造嘅板車,清洗會較難及有生鏽嘅問題,仲容易撞花牆身裝潢,於是公司主力推塑膠板車,希望吸引到人轉用。當時冇乜人識我哋個品牌,每日我要拎住塑膠板車去工廠大廈洗樓,日日食閉門羹。好彩係2、3個月後,我就傾到美心、聖安娜及嘉頓等公司肯試用我哋嘅產品,之後仲成功傾成合作。」

將構想變為真實

除了板車外,其力行還開發出不同的產品,Ken表示成功把客戶的構想變為成品,最有滿足感,「客戶搵我哋都係度身訂製,會有好多個人化嘅要求,就算係板車都有唔同嘅高矮長闊,有時仲要不斷修改,試過前後改成12、13次先收貨。另外,客戶會有自己嘅諗法,然後問我哋整唔整到,好似最近我哋同富臨旗下嘅品牌合作,設計塑膠燒豬托盤,從冇到有整咗個佢哋滿意嘅樣辦出嚟,個滿足感好大。塑膠品嘅可塑性大,唔會局限死一樣產品,呢個都係我做咁耐都未覺悶嘅原因。」

由最初的營業員,升為營業主任、副經理,到11年升任為營業經理,Ken表示不斷擴展市場是他的首要任務,「除咗香港市場外,現時澳門有8成酒店洗衣房都用緊我哋嘅塑膠布草車。嚟緊打算發展東南亞及澳洲市場,好似最近我有去日本及澳洲嘅洗衣工場睇過,佢哋大多用緊鐵嘅布草車,當中有好大嘅開拓空間,希望可以將公司嘅產路推到更多嘅地方。」

點入行?

Ken入行當營業員超過15年,他對於有興趣入行做營業員的人士有一些建議,「要做一個好嘅營業員,首先對自家產品有一定程度嘅認識及知識,應付到客人嘅提問;另外,要有被人拒絕及失敗嘅心理準備,唔係單單生意都傾得成。客戶有時會喺辦公時間外打電話畀你問嘢,你都要盡快覆番佢哋,份工絕對唔輕鬆。」初入職成為營業員的基本月薪約$10,000至$13,000,再加額外花紅,現時身為營業經理的Ken,年薪超過50萬。

cliffton.com.hk

優越僱主