2744 2938 2623 9000 ecjobs@nextdigital.com.hk 香港新界將軍澳工業村駿盈街8號

今期熱話

凍肉鋪二代 現代化革新兼推網上送貨服務

父母一代,以勞力及努力養大小孩,辛苦了大半輩子,卻慢慢趕不上時代的步伐,在經營店鋪時,更頓感吃力。今年34歲的阿達,是順興凍肉鋪二代,10年起接手其中一間分店,為了延續父母的心血,他一步一步令凍肉鋪與時代接軌,包括使用收銀機、閉路電視、點貨系統,及引入各種年輕人喜歡的肉類及食品,如斧頭扒、廣島蠔及芝士火鍋等貨品。同時,他亦開始着手網上宣傳及網購送貨服務,希望透過網絡令凍肉鋪衝出深水埗,吸納更多年輕顧客。

採訪當日,阿達正在深水埗店中打點,他向記者介紹鋪中一些比較特別的食品,「平時嘅雞翼多數嚟自巴西,但我哋有賣泰國雞翼,皮薄啲,容易熟。最近多人買丸打邊爐,陳皮魚蛋都幾受歡迎。另外,安格斯牛扒、斧頭扒、冰鮮龍蝦都幾好賣。」

除了收銀外,阿達還不時執貨、點貨及教店務員使用收銀機,「鋪頭好多都係做咗好多年嘅姐姐,好多都唔識用電腦,所以最初我要教佢哋用電子化嘅收銀機會有啲難度。試過有員工唔肯學,唔肯改變而辭職,但大部分都肯學,同埋好快上手。」

沒有收銀機

生於科技時代的我們,一定覺得很奇怪,用收銀機對於店鋪來說,不是必然的嗎?阿達說:「順興開咗三十幾年,我未接手前,父母仲係用緊個桶嚟收錢,冇乜防盜意識,試過俾員工偷錢。佢哋點貨只係靠腦記,批發方面,唔理乜嘢餐廳都批,有時要3個月至半年先收到錢,亦有走數嘅情況。」阿達欣賞父母的勤力,但感到他們缺乏管理思維,便決定逐步將營運變得現代化。

順興凍肉鋪分別在深水埗及石硤尾設店,10年,阿達接手深水埗分店後,第一時間到貨倉學習,「雖然自小學開始有喺鋪頭幫手,但接觸管理都係第一次,所以想認識有乜嘢貨,好似豬牛雞羊嘅種類及級數,想將貨存數據化。另外,最急切係運用收銀機及閉路電視,增強店鋪保安之餘,亦知道員工有冇收多畀少錢,減少老闆監察嘅工作。」

俾伙記寸

05年,阿達在中文大學心理學系畢業,曾做過結他老師,「直至10年時,覺得父母年紀開始大,唔想佢哋成日搬搬抬抬,就全職返屋企幫手。」學切肉又學操作機器,他真的不懂如何入手。「我都唔知切爛咗幾多肥牛,惟有自己拎返屋企食。初初伙記見我做唔到,仲會寸我。」慢慢由硬件配套開始學習兼革新,阿達對於店鋪的經營亦慢慢上手,於是開始向入貨方面埋手。

阿達表示平日會參考雜誌介紹甚麼潮流食品,他說早前放題吃到的甜薯及台灣的千層蛋糕都賣得不錯。「我會入時興嘅貨品,好似最近好多人拎住舊斧頭型嘅肉影相,我都有入到呢款斧頭扒,真係幾好賣。另外,我仲有入有機及冇激素嘅食品,因為年輕一代比較注重健康,又或者想小朋友食得健康啲。」

然而,阿達在選貨上亦交了很多學費,「我同朋友都好鍾意食阿拉斯加長腳蟹,諗住實好賣,點知冇人買,原來好多客都話有家人對海鮮敏感;又試過入急凍虎蝦,但鋪頭附近有魚檔,啲客走晒去買新鮮嘅。吸收過呢啲經驗,現時我揀貨都會好小心,考慮更多方面。」

推網上送貨服務

阿達深知街市凍肉鋪乃夕陽行業,為了謀求出路,他希望吸引更多年輕的客人,故在兩年前起,便着手網上宣傳,並同時引入多種受年輕客人歡迎的貨品,「我主力喺facebook宣傳,推出網上送貨服務,購買任何貨品加$38,就可以有得送貨,都吸引到跨區嘅客人嚟買嘢。」

現時網購只佔整體生意額的3%,阿達認為成績有待改進,他表示網上宣傳是一門高深的學問,自己仍在學習中。「我對online市場唔了解,一開始試過畀錢買like,點知好多南亞裔人嚟like;同埋就算有100個人問,只有1個人會買;佢哋仲會問埋我點煮先會好食,問好多問題,每日我要回覆提問到凌晨12點,都幾攰。」雖然收鋪後,仍要面對大量提問,但每當阿達替客人解決了問題,他都會有成功感。

批發給初創公司

現時凍肉鋪的業務主要分為三方面,分別是實體鋪、網上送貨服務及批發給餐廳,「以前父母唔會點篩選餐廳去供貨,現時我會了解多啲餐廳嘅背景先,偏向搵一啲初創公司合作,希望幫到佢哋,同時畀人知道我哋嘅凍肉鋪,會吸納年輕客人。」

順興凍肉鋪深水埗店月賺約5至6萬,比阿達接手前盈利升了約2成,「石硤尾店由父母打理,都已經進行緊改革。現時我做到啲成績,證明到改革嘅方向係對鋪頭有利,嚟緊我希望再開分店,及增加批發嘅生意。」

後記:不怕寒冰的一對手

採訪當日,攝影師要拍攝食品的相片,阿達手持兩隻急凍龍蝦在手上一段時間,記者擔心他的手會否凍僵時,他卻輕描淡寫地說:「做呢行,我已經練出唔怕凍嘅手,拎幾耐都得。」記者趁他放下龍蝦,就測試自己有沒有這個能耐,結果30秒內放棄,然後內心為阿達鼓掌,果然每一行都會練出不同的絕技。

點入行?

雖然現時店中以成熟的店員為主,但阿達亦歡迎年輕人加入。對肉類有認識、有耐性及有零售經驗為佳,阿達表示員工獲聘後,會提供在職培訓,訓練他們切割不同肉類的方法、機器操作、使用收銀機及一般店內的工作程序。店務員時薪約為$40至$50。查詢:5401 3988

優越僱主