2744 2938 2623 9000 ecjobs@nextdigital.com.hk 香港新界將軍澳工業村駿盈街8號

今期熱話

青雲路 : 行內阿姐 分享推廣宣傳心得

香港作為商業社會,為商戶服務的公關及市場推廣公司多不勝數,每年亦有不少畢業生投身 PR及 marketing的工作,可能有人認為只要懂得交際應酬、花錢做廣告、印刷宣傳品,便能做好品牌推廣工作,其實當中有一定的技巧,工作絕不輕鬆。今期〈青雲路〉找來 80後的公關總監 Babie及市場發展總監 Sandy,以過來人的身分分享工作上的所見所聞,令各位剛畢業而想入行的新鮮人,作出更充足的準備。

Case 1 做 PR都要文筆好

訪問當日, Babie正為香港城市大學的「傑出學生市場顧問」頒獎禮負責安排傳媒採訪的事宜,「之前要做好傳媒邀請,同事一早就過嚟準備場地,與在場人員了解 run down,跟住安排傳媒幾時可以為參賽者拍照及做訪問。」
Babie身為 Memo Plus Production創辦人及公關總監,她表示公關的工作很多元化,不只溝通能力要好,文字處理能力也要有一定水準,「日常要見客開會、籌備 event、 set場、寫新聞稿、聯絡傳媒及安排人物專訪等。記得自己初入行做公關助理,要剪報、寫 report及 call客,當時先知 PR要寫好多文字稿畀客戶及傳媒,所以新人嚟面試時,我哋都會安排佢哋打篇新聞稿,了解佢哋嘅文筆及打字能力。」

構思角度吸引傳媒

修讀心理學的 Babie, 03年畢業後回家中的餐廳幫忙,其後在 07年參加了香港電台舉辦的 Youth Power活動,讓她有份參與製作電台節目,她說這些工作經驗有助她日後公關的工作,「喺餐廳工作時,因為有到會服務,要幫客人諗餐單、搞場地佈置及籌備,同搞 event冇咩分別;參加 Youth Power活動,我有得參與《一潮天子》嘅節目製作,當中有訪問嘉賓嘅環節,從中摸索到訪問人嘅技巧,亦會明白傳媒大致需要被訪者乜嘢嘅角度及資料,幫助到我𠵱家諗主題或者角度吸引佢哋嚟採訪。」
一直對 PR工作有興趣的 Babie,在 11年加入了一間 PR公司工作,其後於 13年,與 2位拍檔一同成立 Memo Plus Production,為客人提供公關及市場策劃服務,合作過的機構包括旺角中心、 Double A、北京同仁堂及香港咖啡行業協會等。 Babie表示做 PR要有好的學習力才能處理不同客戶的要求,「做 PR會接觸到唔同行業嘅公司,幫客戶做適合嘅市場策劃時,要先了解客戶嘅資訊,同時又要了解市場上流行緊嘅事物。基本每日要睇報章雜誌,留意社會發生緊咩事,要保持好嘅學習態度,及對事物有好奇心。」

應徵工作都要細心

幸運地, Babie表示工作多年未曾出現過公關災難,她認為事前準備充足及處事細心是當中的關鍵,而這些在應徵工作時也可應用到,「𠵱家多數求職者都係用 email寄 cv過嚟,見過有人封 email列晒佢同時轉寄畀其他公司,呢啲位會令我覺得佢唔太尊重呢份工,第一印象已經唔好,而且佢做事唔小心,工作時容易得失客人,呢啲連 cv都唔使睇就 out咗佢。」

http://www.memoplus.hk

Case 2 主動接觸吸收新事物

臻昇傳媒集團是一間專為想進入內地市場的香港及海外品牌,提供市場推廣服務,合作客戶包括 re:HEALTH、稻香、富衞、翠華及大塚製藥等超過 200間公司。
創辦人及市場發展總監 Sandy,時常要與兩地客戶溝通開會,她認為有良好表達能力,對做 marketing有一定優勢,「要將啲推廣方案清晰表達,令客戶明白,尤其中港兩地嘅文化有分別,例如出新聞稿用字都會唔同,香港嘅客可能睇唔慣或者唔明白,你就要解釋番畀佢知。有人嚟見工時,我哋都會睇佢點自我介紹,有冇 present嘅技巧,如果連自己都 sell唔到,可能就唔係太適合呢份工。」

返廣州發展

09年,修畢市場推廣的 Sandy,先後在化妝及時裝公司做市場推廣的工作; 12年,她與丈夫 Chois去廣州發展,開設手機 app開發及設計公司,「 Chois做開 programming,佢喺內地工作過,覺得幫中港公司寫手機 app有得做,加上內地創業成本低啲,最後決定喺廣州開公司。」
其後 Sandy看到微信在內地日漸普及而產生的商機,決定把公司轉型,成立臻昇傳媒集團,利用微信平台幫香港客戶做市場推廣。她認為要做一個好的市場推廣人員,要對新事物抱有足夠的好奇心及主動了解的心態,「當時微信推出冇耐,香港冇乜人清楚微信係乜嘢,係內地同事有日同我哋講起微信呢個 app唔錯,我了解完後,感覺呢個平台可以幫到商家做內地營銷。其實利用到市場上出現嘅新概念或技術做推廣,往往會收到奇效,所以做 marketing要 keep住留意新事物及吸收新知識,先可以諗到新橋幫客人做宣傳。」

與內地網紅合作

最初臻昇只為客戶開微信號,慢慢開始提供不同的市場推廣方案,包括微信平台維護、發文、舉辦線下活動等,最近更製作影視節目及找網絡紅人合作直播,「內地人睇直播平台嘅風氣好盛行,我哋同內地平台傾好合作,搵香港嘅 KOL拍攝特色節目,然後放上佢哋個平台播放。嚟緊更會與內地網紅合作製作購物平台,令商戶嘅產品可以更直接推廣畀內地市民。」

http://www.chinamarketing.com.hk

點入行?

對於想有興趣加入公關及市場推廣的人士, Babie及 Sandy都認為對工作有熱誠,及有好的工作態度十分重要, Babie說︰「即使唔係主修公關都可以入行,最緊要夠主動及有熱誠,畢業生嚟見工,問佢點解想做 PR及 PR係做啲乜嘢,有啲會答唔清楚,話想嚟學嘢及試下,呢樣只係表現到你準備不足,如果你想做一份工,點都答到份工大約係做咩。」 Sandy表示最好對公司一定認識,「見工時了解公司資料,大約知佢最近有咩 job做過,第時入嚟做你都會快啲上到手。」

晉升階梯

市場推廣╱公關主任( 2年或以上經驗)$16,000至$20,000

市場推廣╱公關助理主任( 1年或以上經驗)$12,000至$15,000

市場推廣╱公關助理(毋需經驗)$9,000至$12,000

撰文:曾志恒
攝影:林文樂、葉偉豪
部分圖片由被訪者提供



青雲路
行內阿姐 分享推廣宣傳心得
15-06-2017

青雲路Premium Position
市場大趨勢 開環保公司專做數據銷毀
15-06-2017

創業通
90後的大碼時裝
15-06-2017
優越僱主