2744 2938 2623 9000 ecjobs@nextdigital.com.hk 香港新界將軍澳工業村駿盈街8號

今期熱話

青雲路 : 廣告監製及導演 分享入行貼士

網絡及影音平台的發達,與拍攝器材的普及,造就影片製作成為近年年輕人想入行的熱門行業之一。要入行,掌握相關技巧未必足夠,今期〈青雲路〉找來 80後的廣告監製阿浩及廣告導演 Tommy,以過來人的身分分享工作上的所見所聞,令各位剛畢業而想入行的新鮮人,作出更充足的準備。

CASE 1 有創意不等於冇紀律

V-monkeys是一間以惡搞及創意廣告作賣點的廣告公司,製作不少近百萬點擊率的影片,合作過的品牌包括 Microsoft、 Hiruscar、 WeLend、京都念慈菴及吉野家等。
阿浩身為 V-monkeys創辦人及監製,從事廣告片製作多年,他表示創意是需要,但紀律及團體合作才是成功的關鍵,「試過之前有個導演,佢學嘢快,工作嘅質素唔錯,但份人冇交帶及時間觀念,需要埋位時搵唔到人及遲到,我會先同佢傾,希望佢改善,最後佢選擇離職。我認為製作影片,好似開動緊一艘船,每個崗位嘅同事要配合,先可以向啱嘅方向前進, 1個人擅離職守就會影響到成件事,所以自律及團體合作好重要。」
今年 31歲的阿浩於珠海學院修讀傳理系副學士, 11年畢業後,他與友人一同成立紅白藍製作,開始了影片拍攝之路,「公司得我哋兩個,接到 job就搵拍攝團隊。雖然我擔任製片,但場地、道具、訂飯盒都由我負責。當時公司盈利唔多,自己另外做份 sales工嚟維持生活,自己對拍片好有興趣,工作係辛苦,但都堅持落去。」

簽 KOL拍片

阿浩認為機會需要自己爭取,很多機會也是緣於自己的不害羞。 14年,他有機會先後負責統籌拍攝《那夜凌晨,我坐上了大埔開往旺角的 GoGoVan》及《收兵三十六計- G Cup小喬激戰霸氣 Eminleo》,短片不但得到過百萬點擊,還讓他認識了一眾 KOL,「喺拍《那夜凌晨,我坐上了大埔開往旺角的 GoGoVan》時,認識咗 Eminleo、伍公子、薑檸樂等 KOL,知道佢哋冇經理人,我就大膽提議做佢哋嘅經理人,估唔到佢哋會答應。」
15年,紅白藍製作各人各有發展,阿浩決定另組公司,與朋友 Gear創立 V-monkey,「之前與 Eminleo、伍公子、薑檸樂等合作開,開咗公司後亦簽咗佢哋成為公司嘅一份子,拍唔同嘅影片擺上網,佢哋有一定嘅人氣,而且各有專長,慢慢吸引到品牌嘅注意,令公司發展順利啲。」

見工如見客

平時需要外出見客的阿浩,覺得面試與見客一樣也需要準備充足,「請剪接、美術嘅職位,我哋需要睇求職者嘅過往作品,有啲人兩手空空上嚟,面試時問佢有冇作品,佢會問你借電腦,然後喺 YouTube頻道搵或者網上下載番作品,有時仲同你講條 link冇咗。如果見客時係咁,對方應該唔會再同你傾落去,畀人感覺你都唔尊重呢次 interview,呢啲人我都唔會考慮,最好係整理好自己嘅作品先嚟見工。」

http://www.vmonkeys.com

CASE 2 聽別人意見好重要

今年 28歲的 Tommy已是一名廣告導演,同時是網上平台「啱 Channel」的主理人之一,曾與他們合作的機構包括海洋公園、必理痛、禁毒處及積金局等,他表示無論處於團隊的任何崗位,懂得溝通最為重要。「拍廣告片條橋好多時需要各人嘅集思廣益,好少話一個人諗掂晒,而且有冇創意,有時都幾主觀,加上諗到 idea仲要最後做到,你要令同事及客戶明白你想表達乜嘢,先完成到個作品及出到街。」

轉工由頭學起

Tommy在香港理工大學修讀 digital media,畢業後便投身拍片行業,曾經也是新人的他,認為正確的學習態度十分重要,「最初我入咗間規模較細嘅 studio度做,我擔任副導演及剪接。自己讀書時成績唔錯,拍嘅片不時俾老師及同學稱讚,所以當時好有自己嘅睇法,唔太聽人意見。但去到拍完段片畀客戶睇時,客戶往往都話唔得,第一、二次就以為人哋唔識欣賞,到第三、四次之後,開始會諗係咪自己嘅問題,先開始肯聽前輩點講,發現自己仲有好多嘢要學,之後轉咗去間大嘅製作公司做剪片助理,決定由頭學起。」

留意其他部門運作

其後 Tommy加入了現時的公司 glance limited任職剪接,因做事有想法及基本功不俗,不久便得到上司賞識,有執導網上短片的機會,他覺得新人肯主動學習,會有更多發展的機會,「自己做剪接時會留意下各部門間嘅運作程序,一段片會經過咩步驟最後先出到街,其實未必關自己事,但學到唔同嘅知識,將來可能會有用。自己私下亦鍾意拍片, 13年時同朋友喺 facebook整咗個『啱 Channel』嘅平台,拍片放上去分享,經營咗年幾,上司知我有呢方面嘅經驗,就畀機會我做導演,拍有關 MPF嘅網上短片,加上之前嘅工作經驗,幫到我完成導演嘅工作。」

mailto:facebook@ArmChannelTV

點入行?

對於有興趣加入廣告製作的人士,阿浩及 Tommy都認為工作態度最為重要,阿浩說︰「𠵱家要學基本嘅剪接及拍攝技巧一啲都唔難,坊間好多課程去修讀,或者上網自學都得。面試時我會留意佢對呢行有冇熱誠,技巧上唔夠好唔緊要,因為份工真係你想做時,自然會去學,有想做得更好嘅念頭,先會做到好嘅作品。」

晉升階梯

導演( 7年或以上經驗)$20,000以上

副導演( 4年或以上經驗)$13,000至 15,000

製作助理(毋需經驗)$9,000至$11,000

撰文:曾志恒
攝影:林文樂



青雲路
廣告監製及導演 分享入行貼士
18-05-2017

青雲路
2017活力之星 大獎揭盅
18-05-2017

青雲路Premium Position
自家烘培咖啡豆 做批發起家
18-05-2017

創業通
玩detail賣花紋內裡西裝 吸年輕客人
18-05-2017
優越僱主