2744 2938 2623 9000 ecjobs@nextdigital.com.hk 香港新界將軍澳工業村駿盈街8號

今期熱話

青雲路 : 藝術×建築 玩出新意

實用與創意是否難以並存?畢業於香港中文大學藝術系及香港大學建築系的 Ricci,認為物件實用也可有創意,這 7年來一直從事建築藝術的工作,如漫花叢、緒舞間、 Yoho Playable Arts均出自他之手,這些創意令新鴻基、 Haeco、國泰、 Swarovski等不同機構找他合作。 16年,他出來自組公司 RAAW,希望造出更多讓市民津津樂道的建築藝術。

早前在銅鑼灣利園舉辦的「雞蛋仔藝術節」,場內除了集合多間售賣特色雞蛋仔的餐廳讓人留有印象外,當中還有一件裝置藝術品「雞蛋仔皇后寶座」,成為各到場人士的熱門拍照打咭位,負責設計該藝術品的 Ricci,正是 RAAW設計事務所的創辦人。
Ricci表示他的職業有些難以介定,有人會稱呼他為建築藝術家,「建築畀人嘅感覺係實用,藝術就係不切實際,我覺得一件作品可以展現實用與玩味。好似今次設計嘅雞蛋仔皇后寶座,主辦者搵我設計標誌性嘅藝術擺設,例如好大個雞蛋仔係夠出位,但又會冇咩用途,我就設計咗雞蛋仔外形嘅寶座,遊人可以坐上去影相,夠標誌性之餘,又收到商業嘅宣傳效果。」
主張藝術及建築感並存的設計, Ricci的創意得到不少公司的賞識,曾與新鴻基、 Haeco、國泰、 M+博物館等不同機構合作,他負責當中的展覽、設計及藝術裝置等工程。

運河啟發讀建築

喜愛畫畫的 Ricci,在投考大學時,選擇了香港中文大學藝術系,「啲人話讀藝術搵唔到食,出到嚟先知生活艱難。 02年畢業後,我加入一間畫室教畫畫,冇耐就遇上 SARS,市道好差,當時返工地方好近中央圖書館,成日去搵藝術資料,隔離書櫃擺放建築書藉,有次拎嚟睇,睇到英國一條叫 Falkirk Wheel嘅運河設計,好似一個比船搭嘅摩天輪,仲解決咗河道高低落差嘅問題。睇完覺得好震撼,原來設計可以咁玩法,實用設計都可以好天馬行空,萌生咗讀建築系嘅衝動。」
03年, Ricci成功報考香港大學建築系,並在 09年修畢碩士課程,其後他在導師的介紹下,接到一些工程,於是他成立了 Art Lab創作公司,以方便洽談工作,「當時自己做埋 contractor,接過室內設計、裝修及展覽工程。除咗見客外,阿爸係做打鐵,自己從小有跟佢學打造金屬嘅知識,加上有建築底,會易啲明客人嘅想法,仲會落埋場去做,做到客人要求嘅效果。有接過 10年港深建築雙年展嘅項目,我負責造當中 20件建築展品,工作發展唔錯,由 home office到租咗現時火炭嘅單位做工作室。」

PMQ創立 LAAB

13年, Ricci邀請了兩位同伴一同創立 LAAB,希望闖出更大的一片天,「當時搵咗港大師弟 Otto及做建築師嘅小學同學阿亨,加起嚟打算互補長短,可以拓展業務,當時我哋租咗 PMQ,以創新嘅設計意念做賣點,工作範疇由家具、室內設計、藝術作品及產品都有。」成立數年間,公司已發展成數十人規模,接過 300項各式各樣的設計工作。
說起難忘的作品, Ricci興奮地說起曾展出的藝術裝置,「有年 PMQ搵我哋 LAAB參與一個設計展,但只得 14日畀我哋整藝術品,我哋冇多考慮就應承咗。其實我一直有個整緒舞間嘅構思,有呢個機會當然唔會放過。我哋搵咗唔同人合作,好似時裝設計師、機械工程人員等,結合絲巾及機械遮骨做出好似水母緩慢郁動嘅效果,成個機構用咗 7日去定型,之後趕工整咗 13隻出嚟,再要佈置展覽場地。嗰排 1日做 20個鐘,大家都好辛苦,但最後出嚟效果好好,參觀者都覺得好特別,呢個 project除咗得到實現腦海中所想嘅快樂外,仲靠大家群策群力完成咗一件不可能嘅任務。」

在 LAAB任職期間, Ricci負責過不少具創意的計畫。

拆夥自組公司

去到 16年,因公司業務出現爭拗, Ricci決定辭去 LAAB的職務,回到火炭工作室,自組公司 RAAW,繼續他的創作,「喺呢行都做咗啲成績,會有人主動聯絡我合作,最難嘅地方係資金流,因為工程多數係完成之後先再畀尾數,中間你就要墊支住先,又要請人畀薪金,頭半年靠蓄儲及向家人朋友借錢周轉,𠵱家開始上番軌道。嚟緊同新鴻基、國泰、希慎等機構都有合作項目,但未出街唔可以透露太多詳情,不過相信仍然會帶到畀大家驚喜。」

RAAW: http://www.raawstudio.com

Sheryl:之前與 Ricci合作過,覺得佢嘅設計好有創意,舉辦「雞蛋仔藝術節」時就已經決定搵佢再合作,佢提議嘅藝術裝置符合到我哋活動嘅主題,見到啲人都會同個裝置影相,對呢次合作好滿意。

晉升階梯

室內設計師
( 2年經驗或以上)
$15,000至$20,000

初級室內設計師
(毋需經驗)
$12,000至$15,000

後記︰不是怪獸家長

與身為兩女父親的 Ricci談論如何教育下一代,他說給予發展空間很重要,「兩個囡囡分別 5歲及 10歲,如果問成績,佢哋一定唔會係全級考第一嗰啲,我唔會逼佢哋讀書,反而着重留意發展佢哋嘅興趣。我不時都會帶佢哋上工作室,畀佢睇吓我工作嘅地方,近排個大女愛上咗木工,跟我學鋸木。」聽到這記者十分羨慕有這樣的父母,亦希望各怪獸家長認真想想,不要留給仔女只有學習班的童年。

撰文:曾志恒
攝影:葉偉豪、劉宇軒
部分圖片由被訪者提供



青雲路
藝術×建築 玩出新意
16-03-2017

青雲路Premium Position
香港品牌代理 專發掘各國特色潮牌
16-03-2017

創業通
設計2kg重結他amp 方便周圍去夾band
16-03-2017
優越僱主