2744 2938 2623 9000 ecjobs@nextdigital.com.hk 香港新界將軍澳工業村駿盈街8號

今期熱話

青雲路 Premium Position : 90後手袋設計師 以色彩及多格數手袋 打入世界市場

不論是好動型、可愛型還是高貴型,每個女孩都希望擁有一個 dream bag,將自己的行裝必需品一一放進這個百寶袋。今年 25歲的 Vriko,自小對皮具甚有興趣,對手袋的實用性很講究,她在 14年創立自己的品牌 Poupée de Papier,她設計的手袋以多色彩及多格數作為賣點,現時已有超過 30個國家的客人向她入貨。 Vriko希望大家可以於手袋中找到屬於自己的顏色,感受當中的快樂。

「呢個 clutch夠大放 passport,有 6個 card holder位,仲可以放散銀,同埋格數足夠放 3個 iPhone,有時去旅行想要個輕便又放到多嘢嘅隨身小袋子,呢個會好啱用!」採訪當日, Vriko向記者介紹每個手袋的設計及用途,每個手袋的細節都根據實際需要而設計,例如防盜位、加大的翼位、穏穩固純銅製的肩帶扣等,各具特色,令記者不禁蠢蠢欲買。
Vriko於浸會大學主修翻譯及副修法文, 13年更到挪威卑爾根大學修讀北歐政治, 14年畢業後,她與朋友合作做網上護膚品生意,但她卻心繫皮具製作,「媽媽做歐洲時裝生意,我 15歲已經接觸皮具,了解染皮、剪裁、電腦製作草圖同縫皮嘅過程,當中以牛皮同羊皮嘅銀包、手袋、帽同鞋為主,而我特別鍾情手袋。」

建立個人品牌

朋友知道 Vriko的理想與興趣,便鼓勵她創業,賣自己的設計,建立個人品牌。 14年, Vriko成立 Poupée de Papier,她笑言小時候與大部分人一樣愛買大品牌的手袋,但她慢慢喜歡上小品牌的設計,以簡約及適合日常生活使用為主,尤其喜歡設計師 Pierre Hardy的作品。
「我想設計 colourful、中價、格數多又實用嘅手袋,於是我去讀短期手袋設計課程,深化自己嘅知識。」到實際與廠商溝通時, Vriko才發現製作一個手袋需要很多周詳的考慮,「好似拉鏈係內縫定外縫,細節位用單線、雙線定回線,內履要有幾多層等,全部都要畫得好清楚,同埋要同師傅交代得好仔細,喺起好頭辦後,再慢慢執細位。」

去挪威賣魚

第一批 LALA STUNNER系列的手袋生產了約 1,600個,設有紅、黃、藍、白、紫及薄荷綠等 15色,用了約 10萬資金。 Vriko表示:「頭一兩個月反應唔錯,每個定價$988,賣咗約 300個,但之後反應就轉向平淡。當時我先知唔係出晒貨就可以,宣傳同管理都要做得好,先會有市場反應,但我一次過用晒啲錢,為咗賺資金, 14年,我返去以前喺挪威讀書嘅城市賣魚,做唐人生意。」
看似風馬牛不相及的生意,卻為 Vriko帶來了機會,漁市場的老闆同時有經營時裝店,他覺得 Vriko的經歷很有趣,於是向她購入 150個手袋,放在時裝店出售,成為打入了歐洲市場的契機。
花了 5個月時間, Vriko賺了 13萬回港,並設計多一款 tote bag,增加款式以及聯絡不同國家的 blogger及 YouTuber合作,加強宣傳效果,「我最大優點係唔怕醜,周圍問人有冇合作嘅機會,結果瑞典、美國同波蘭嘅 YouTuber都肯合作,試過條片一出,我即刻多咗 500張訂單。」

分銷至 30個國家

現時 Poupée de Papier分銷至英國、美國、澳洲、波蘭、法國、日本、德國及北歐等超過 30國家。 Vriko說:「我仲會去外國嘅 fashion week,可以識多啲時裝名人同 department store買手;香港方面,我參加咗青年創業家商會,會同唔同範疇嘅單位合作活動,增加品牌嘅曝光機會。」
除了 tote bag外, Vriko還陸續設計了 clutch、 wallet on chain及 bucket bag等款式,她表示每月約賣出 400至 500個,每個售價由$700至$1,200不等,公司年賺約 100萬,她希望日後每季推出一至兩個新款,下個目標推出 pouch bag及背囊款式。

網址: http://paperdoll.fr
facebook@Poupée de Papier

Macy Lin:我覺得 Poupée de Papier嘅袋款式靚,價錢合理又實用,仲要有保養。每個款我都起碼有兩隻色,當中最鍾意係 Lala Stunner系列嘅紅色,我去任何喜宴場合同埋新年都一定會用。而 Wallet on Chain可放齊證件、信用咭、外幣、電話同基本化妝品全部可以放晒入去,真係好啱旅行用。

點入行?

Vriko的年薪超過約 50萬,她表示若有興趣成為手袋設計師,可先修讀皮具設計課程,「米蘭嘅皮具學校比較出名,例如 ModaPelle Academy學校就有分 3個月、半年及 1年嘅課程可供修讀,可以了解製作過程、揀皮、搵廠同設計技巧,好實用。」完成課程後,可以嘗試加入皮製品品牌公司學習營銷的方法,再考慮建立自己的品牌。

撰文:霍芷晴
攝影:劉宇軒
部分圖片由被訪者提供



青雲路Premium Position
90後手袋設計師 以色彩及多格數手袋 打入世界市場
16-02-2017

青雲路Premium Position
成功靠實幹 清潔公司太子爺由執垃圾做起
16-02-2017

創業通
捱過考驗 泡芙店得米芝蓮推介 起死回生
16-02-2017
優越僱主