2744 2938 2623 9000 ecjobs@nextdigital.com.hk 香港新界將軍澳工業村駿盈街8號

學海無涯

學海無涯 : 學訓練狗狗 入行做犬隻訓練員

電影《再見亦是狗朋友》講述一隻狗輪迴轉世的 4段不同經歷,包括成為金毛尋回犬、幫助警察的德國牧羊犬、可愛的哥基和最後的大型混種犬,牠透過每段與人類相處的經歷而學懂不同的技能。
現實中,如保安員、警察及海關等工作,都需要有工作犬配合,讓狗狗學識聽從指令,可是一門學問呢!
香港聖公會麥理浩夫人中心舉辦了,專門針對訓練工作犬的犬隻訓練員證書課程,讓學員學習與狗狗相處,建立領導關係並進行訓練,訓練犬隻協助人類工作。

課程由擁有超過 50年犬隻訓練經驗的張松照師傅任教,除了理論外,張師傅更着重學員親身與狗隻相處和進行練習。「我會教學員控制狗隻行為嘅方法、分辨狗隻動作嘅意思、訓練時嘅安全守則和接收 sit、 down及 stay等指令。」上堂時,每位學員都會獲派一隻狗狗,每星期學員都會與同一犬隻進行訓練,以便培養感情及人犬的合拍度。

觀察狗狗行為

張師傅指坊間各行業的工作犬多為大型犬種,故課堂上會讓學員訓練馬蓮萊犬、狼犬、邊界牧羊犬及唐犬,「學員被獲派犬隻後,我會先教大家觀察狗嘅行為,了解佢哋嘅狀態,好似放鬆擺尾代表歡迎;直立崩緊擺尾代表佢好有自信,若隨便靠近,可能會被佢攻擊;仲有條尾捲縮咁擺,代表隻狗好細膽,自我保護意識重,亂咁撩佢都有機會被攻擊。」張師傅表示不能一本通書看到老,要靠學員與狗狗的相處,從而累積經驗。

用食物教指令

課堂上,張師傅首先會教學員與犬隻建立領導關係,「時刻保持狗喺自己左邊,同埋要比佢行快半步,狗嘅頭部貼住自己前膝位置,如果出現吠、跳起或掙脫都可以即時制止。喺教指令方面,我哋會用食物做輔助,我會教學員餵食嘅方法及路徑,例如叫佢 sit時,要推後餵食; down時,會用『 L』方向放低食物喺地。」修畢課程後,學員可以當領犬員、需要犬隻伴同的保安員及各機構的犬隻訓練員,薪金約$10,000至$13,000。

師傅 張松照
學員以女士為主,年齡約 18至 40歲,好多都係本身有養寵物,想學點樣訓練寵物跟隨指令。亦有啲學員諗住入行,部分工種如夜更保安員會需要與犬隻一同巡邏。

學員 嘉玲
我養咗兩隻狗,想教好佢哋。上堂時,我覺得一開始同犬隻溝通唔係咁易,但學識觀察佢哋嘅動靜,好似口合埋、尾唔擺、眼定定望住你,係代表警戒嘅狀態。𠵱家學咗 9個月,對呢行都有興趣,想試吓訓練唔同嘅狗種。

學員  Joe
我做測量業,平時會去做放狗義工,但見到有啲狗會搶繩及唔服從指令,想學方法訓練佢哋。我學咗兩年,覺得餵食嘅手法需要多啲時間訓練先會熟習,見到佢哋成功做到指令,真係好有成功感。我有考慮日後全職做犬隻訓練員。

課程:領犬員/犬隻訓練員證書課程
機構:香港聖公會麥理浩夫人中心
費用:$7,240
堂數: 15堂,每堂 2小時。
日期: 11月 5日至 3月 11日
時間: 11am至 1pm
地點:元朗八鄉錦上路蓮花地
內容:教授犬隻心理及行為、犬隻的本能反應、牽引繩的運用、正確使用訓練的設備及如何控制富攻擊性的犬隻等。
查詢: 2381 8500

撰文:霍芷晴
攝影:葉偉豪



學海無涯
學訓練狗狗 入行做犬隻訓練員
05-10-2017

上COURSE
學成分製作 做化妝品配方師
05-10-2017
優越僱主