2744 2938 2623 9000 ecjobs@nextdigital.com.hk 香港新界將軍澳工業村駿盈街8號

學海無涯

學海無涯 : 創業學煮街頭小食

現時小店愈開愈多,更有不少鋪頭大搞 fusion小食,連雞蛋仔都有十多款口味,例如鳳梨酥及泡菜味雞蛋仔,很受顧客歡迎,亦吸引不少人創業,以小食店起步。為免創業碰釘,可先報讀坊間的小食店創業課程,學製多款街頭小食,為創業作好準備。

咖喱魚蛋唔難整

課程由從事餐飲業 9年的年輕導師 Fire教授,內容理論與實踐並重。 Fire表示:「我會教學員整多款基本嘅香港本土小食,好似煎釀三寶、咖喱魚蛋及雞蛋仔等,亦會教整多款醬汁,可以配搭唔同小食。我亦會喺授課嘅過程中滲入創業嘅知識,包括預計材料嘅分量及保持食物溫度嘅方法等。」

分組比賽學煮小食

中心會提供用具、材料、食譜及廚房予學員練習, Fire說:「上堂嘅形式同之前唔同,過往導師教完之後就輪到學員試整,再從旁協助。今次我會先教學員點整,然後將學員分組比賽,並要求佢哋喺限時之內完成,途中我唔會協助,目的係想佢哋緊記每個步驟,唔好依賴導師,我會從中觀察佢哋有冇做錯,有錯先糾正。另外,最尾幾堂會帶學員落街,觀察附近小食店嘅營運模式,學下啲擺位點先可以做到快靚正。」

Fusion小食唔襟興

坊間有不少小食店都大搞 fusion菜,甚至中西合璧。 Fire表示:「其實玩 fusion係幾有 gimmick,會吸引大量客人,但可惜呢樣做得唔耐,熱潮一過,生意會變得慘淡。我會建議學員先做好基本小食嘅質素,之後先試整 crossover嘅創意小食,先會令生意可長遠發展。除咗食物質素外,客人嘅感受都需要顧及,傳統小食店為求節省成本,會用竹籤,我會建議用紙杯及膠叉代替,畀客人食得方便,又冇咁危險。」

開業成本 50萬

Fire表示有大部分學員因不懂寫計劃書而卻步,所以他會詳細教學員寫計劃書,包括風險評估、資金運用、利潤及選址等。「現時以 100呎嘅鋪位嚟計算,開業成本約 50至 60萬,學員可以選址係荔枝角或觀塘,附近多工商大廈,多寫字樓客幫襯。」 Sam提醒首次創業的人士,要活用社交媒體及派發傳單以作宣傳。

學員阿業
我從事工程工作,對飲食業有興趣,一直想創業開小食店,所以嚟報讀呢個課程,上堂學識點樣寫計劃書,創業方向更加清晰。

學員 Adrian
我已經有計劃想開小食店,可惜仲未儲夠資金,報讀呢個課程,增值自己,學多啲創業技巧,特別係揀鋪位,除咗留意人流外,亦要顧及該區小食店嘅飽和度。

導師 Fire
報讀課程嘅學員約 20至 40歲,年輕人比較多,更有讀緊書嘅學生。已經有 3個學生有創業計劃,爭在未搵到鋪位。

課程資料

街頭小食創業證書課程
機構:仁愛堂 YES專業進修課程
費用:$2,150(學費已包括材料費)
地點:深水埗長沙灣道 202至 204號瑞星商業大樓 6樓(近深水埗地鐵站 B1出口)
時間: 7pm至 9:30pm
內容:教授如何開設街頭小食店、投資及營運的方法,讓對飲食業發展有興趣的人有初步的認識,有助實行創業計劃。

撰文:邵苑雯
攝影:林文樂



學海無涯
創業學煮街頭小食
20-04-2017

上COURSE
正視抑鬱症 舒解壓力有法
20-04-2017
優越僱主